تحويل قفص العصافير لمكتبة للكتب

	بصي بقى يا اوختشي انتي و هي الاول نمسك الربابة و نحكي القصة من اولها يا سادة كان ياما كان في سالف الازمان راجل فقير غلبان اسمه علي بابا لا مش دي طب نقلب الشريط عالوش التاني بقى كان عندي عصافير و كنا جايبين لهم قفص اللي بيبقى كذا دور هو كان 3 أدوار زي ده كدة وعلشان انا في اخر دور فالفيران اتسلوا عليهم واحد واحد اعاااااا لحد القفص ما بقى فاضي نوهائي فقلت استغله خصوصا اني كنت محتاسة في الكتب بتاعتي لانهم كتير لدرجة اني حطيتهم في أكياس و لما زهقت من حركة التنقلات اللي بعملهالهم كل شوية شيلتهم في البلكونة المهم بقى يا اوختشي منك ليها عملت ايه في القفص ؟ ماتيجو نشوف الاول فكيت الاجزاء اللي في الواجهة بتاعته ومارميتهومش ابسلوتلي لأ عملت بيهم الدور الرابع للمكتبة وبعدين دهنته باللون الدهبي وبعدما نشف دهنته بالورنيش علشان يحمي الدهان و ده الشكل النوهائي و صورة كمان نسيت اقولكم اني حطيت القاعدة بتاعت القفص تحت الكتب علشان المعدن مش يتقوس من تقل الكتب عليه ودي صورة بتوضح الرف اهو صورة بقى من بعيد انا حطيت المكتبة في اوضة النوم في الركن اللي بين لتسريحة و الكومودينو وأخيرا اتمنى ان الفكرة تعجبكم وماكونش دوشتكم عالفاضي

عملت بروازين من دوسيه قديم

	كان عندي دوسيه من النوع السميك زي ده بالزبط دي صور اخو المرحوم اللي حنشتغل بيه النهاردة نشمر و نتوكل على الله ؟ ياللا بينا الاول اعرفكم على المرحوم شخصيا 😄💚 نيجي بقى للطريقة اول حاجة عملتها قصيت علافين الدوسيه  و نضفت الأطراف من التلفيات اللي كانت فيهم وحطيت الصور و ثبت الصور جوة غلاف الدوسيه باللزق الدابل فيس علشان مش يتحركوا جوة الغلاف وبعد كدة بروزت الغلاف بالسلوتيب الأصفر زي كدة وكنت بنضف الأطراف بالكاتر وبعد كدة زوقت البروازين بالفوم جليتر زي الصور دي و هنا شكلهم و هما متعلقين

ماسك للنوم

من غير لوكلوك حمسك الربابة و احكيلكم باكورة اعمالي في قسم الخياطة
من فترة كدة شفت ماسكات بتتلبس وقت النوم
و عجبتني اوي جدا خالص
فصممت اعمل زيهم
امال ايه ؟ ما احنا شعارنا
طول ما في مخ عندينا مفيش حاجة تستعصى علينا

المهم بقى
بينا نتعرف على العدة بتاعتنا

 حنحتاج الى :
مقص - ماسك حفلات من الكرتون
قماش قطن للبطانة - طرحة قديمة - قماش فازلين
ستراسات - استك مبطط و رفيع - طباشير
المقص اللي ايده سودا ده مقص مشرشر
لو مش موجود مش مشكلة

نشمر بقى و نشتغل
اول شي حنرسم الماسك بالطباشير عالقماش و هو مطبق على اتنين
و نعمل الخطوة دي مع الطرحة القديمة و البطانة

 و حيبقى عندنا اربع طبقات زي كدة

 حنرص القماش فوق بعضه بالترتيب ده :
البطانة من تحت و فوق منها طبقة من الطرحة و بعدين الاستك
وبعدين الطبقة التانية من الطرحة و بعدين الطبقة التانية من البطانة
و ندبس كله زي كدة

  و بعد كدة ندخل عالمكنة بقى و نمكن الماسك مع ترك جزء من غير خياطة علشان نعرف نقلبه عالوش التاني
و بعدين نركب الفازلين و نعيد الخياطة تاني

بعد ما نقلبه نخيطه من تاني و نزينه بقى
انا خيطت فيونكة صغنونة و حطيت عليها ستراس

 و ده الشكل النهائي
ده بتاعي

و ده بتاع بنوتي

 

محفظة للفوط الصحية من القماش

الفكرة دي لطشتها من النت بس هي كانت لمستحضرات التجميل
فقلت ليه ما اعملهاش للفوط الصحية اللي كلنا بنتحرج نفتح الشنطة اصلا بسببها
و علشان نستعمل الفوطة يبقى لازم ناخد الشنطة كلها معانا
و طبعا حطيت التاتش بتاعي عليها
نبطل لوكلوك و شوفوا الصورة اهي

 الطريقة سهلة خالص
حتخيطي محفظة زي الصورة كدة
وبعد كدة لو عايزة تديها شكل ممكن تداري مكان الخياطة بالالماظ او شريط ستان او اي تطريز تعرفي تعمليه
و الصور اللي عليها دي بتتثبت بمكواة الهدوم عادي
و بقفلها بالسكوتش ( اللي هو اللصق بتاع الكوتشيهات للي مش عارفينه )
و بس خلاويص
واتمنى ان الفوكريرة تكون عجبتكو

كيس خدادية بجيب

الصورتين الاولانيين دول و الريموت جوة الجيب
وممكن نحط الموبايل برضه

مستنية اراءكم لانها تهمني جدددددا

من ازازة بلاستك لعلبة اكسسوارات

فكرتنا النهاردة زي ما العنوان بيقول كدة بالزبط اوكي ؟
بينا عالشغل بقى علشان ما نضيعش وقت في اللوكلوك
الادوات زي ماهي واضحة في الصور كدة

 نيجي للطريقة بقى
الاول فصلت جسم الازازة عن الفوهة و الفاع بتوعها
وبعدين شقيت الجسم بالطول و قسمته ل 6 مستطيلات مقاسهم قد بعض
و بعدين خرمتهم بالكاوية زي الصورة كدة

  و بعد كدة بروزت كل مستطيل بالكروشيه زي الصورة

و هنا ال 6 قطع بعد ما خلصوا

  

 و بعد كدة شبكت الاجزاء في بعض بالابرة و خيط الكروشيه
و ده شكل الصندوق بد ما شبكت اجزاؤه

 و هنا بعد ما زوقته بالالماظ

و شوية صور كمان علشان نشوفه من كل الاتجاهات

 اتمنى ان الفكرة تكون عجبتكم

 

خياطة منظم للسرير

========

كل اللي استعملته بواقي قماش ( اي قماش يكون باقي عندك )
و طبعا المقص و المكنة و الدبابيس ( اصلي مش بحب السراجة )
و دي بواقي الاقمشة



الطريقة سهلة خالص بس مصورتهاش لاني متعقدة من التصوير و انا بشتغل في اي حاجة
كل ما اصور حاجة و انا بشتغل بتبوز مني خالص
نيجي للطريقة بقى
بتحددي مقاس و شكل الجيوب اللي عايزاها و تقصيها و تتني حرفها من فوق
وتركبيها بالترتيب اللي انتي عايزاه
وده الشكل النهائي للمنظم



ومنظر كمان علشان نبين التفاصيل اكتر
ده الجنب اللي عاليمين
الموبايل اللي في الجيب ده مش بتاعي ابسلوتلي
موبايلي هو اللي بصور بيه بس مهانش عليا اسيب الجيب فاضي


وده الوسط



وده من عالشمال


وهنا لما ثبته في السرير
انا حطيته تحت الواح الخشب بتاعت السرير ( العرضات )
معلش هي الصور غامقة لان الجنب اللي بنام عنده الاضاءة فيه ضعيفة